الـبــيــوت أســـرار

القلوب زي البيوت
والبيوت اسرار
بيت تحس بحضن دافى
بيت كإنه قلب جافى
بيت نلاقى فيه سكنا
بيت بجدرانه سجنَا
بيت صغير بس جنه
بيت بشكلو يا ناس فتنا
جوه منه قايده نار

البيوت زي القلوب
ليها نبض وفيها روح
مش مجرد رص طوب
ده كله قالب فوق جروح
متحاولش تكتشفها
او تزيح عنها الستار
سيبها ما تقلبش فيها
دا الرماد بيغطي نار

اوعى تاخد بالمظاهر
حتى لو شفت الستاير
زي طير بجناحه طاير
م السعاده والسرور
دى البيوت عليها زينه
جوه منها قلوب حزينه
والى فيها بعيد عليك
كل نار عن بعد نور

كل بيت جواه همومه
ليه يا ناس ع الناس تلوموا
ع اللي بيدارى فى هدومه
جرح نايم من سنين

كل واحد له عيوبه
واللي تايب من ذنوبه
ليه نقطع ليه فى توبه
والبرئ م الذنب مين

دى القلوب مليانه ياما
من الهموم يالله السلامه
بنداريها ببتسامه
طعمها يدى مرار

دى البيوت اسرار خفيه
عن عيونا متداريه
واللي ايده يا ناس فى ميه
يعذر الى ايديه فى نار

فيه بيوت مقفول ببانها
بس برحه عن مكانها
ليها ريحه من حنانها
تلمس القلب الحنون

في بيوت مفتوحه لكن
الشيطان جواها ساكن
والقلوب زي المساكن
والشبابيك العيون
ما تحاولش تكتشفها
او تزيح عنها الستار
سيبها ما تقلبش فيها
دا الرماد بيغطي نار